السواق
قصة قصيرة (+18)
بقلم | خالد عبد الرحمن
أبو مرزوق واخد خواته التلاتة معاه ونازل ع
الموقف يدور ع سيارة عشان يروحوا مشوار للشمال، السيارات كثيرة، شاور خواته ..
سابوا كل السيارات واتسمروا التلاتة قدام "أبو هاني" .. التلاتة ف نفس
واحد :
هاااي أحسن سيارة .. شايف لونها يا ابو مرزوق !
أبو مرزوق : ماله لونها ؟ عادي .. وبعدين ايش علاقة اللون بالموضوع ؟
أنا سمعت ان ابو هاني سواقته ضعيفة !
الخوات : اسمع .. انت طول عمرك مش عاجبك حدا .. السيارة لونها بيجنن
وبياخد العقل، بلاش تنكد علينا
أبو مرزوق : الله يهبلكوا زيادة ما انتو مهابيل .. احنا إلنا ف السواق
.. ف حالة السيارة .. عمري ما شفت حدا بيختار التاكسي حسب اللون
أبو هاني يتقدم نحو العائلة :
ع وين إن شاء الله ؟
الخوات ف نفس واحد : ع الشمال إن شاء الله
أبو مرزوق وقد وجد نفسه أمام الأمر الواقع ..
أعلن استسلامه وركب السيارة بجوار أبو هاني بلا قوة ولا حيلة، والخوات ع الكنباية
بالخلف.
أبو هاني بدو يطلع بالسيارة .. طراااخ خبط بالسيارة
اللي قدامه .. ريفيرس .. طراااخ .. رزع السيارة اللي وراه
أصوات السواقين وهم بيغلطوا عليه ..
أبو مرزوق : ايش يا ابو هاني .. احنا لسة ف
أولها !
الخوات : مالك يا ابو مرزوق ؟ مش شايف السيارتين كيف كانوا هم اللي
لازقين فيه من قدام ومن ورا !!
ابو مرزوق : الله لا يعطيكون عافية ! اذا هو نفسه ساكت لأنه عارف حالو
غلطان .. انتو ليش بتدافعوا
الخوات لاويات بوزهن من اخوهم أبو مرزوق ..
المهم تحركت السيارة .. ولكن باتجاه الجنوب
وليس الشمال !!
أبو مرزوق : ابو هاني .. كنك توهت ؟ الشمال ياخو .. احنا طالعين ع
الشمال
أبو هاني : وبعدين معاك يا ابو مرزوق ! انت مش عارف انوو
(طراااخ) أخطر اشي انك تحكي مع السواق أثناء القيادة ؟؟ هينا خبطنا ف السيارة اللي
قدامنا !
أبو مرزوق : لا .. وصلنا ان شاء الله
طراااخ
ابو مرزوق : يا ابو هاني انا ساكت من الصبح وانت نازل تخبيط ف
السيارات .. الأدهى انك لسة ماسك طريق الجنوب !!
الخوات : وبعدين معاك يا ابو مرزوق ! مش
الزلمة حكى لك خليك ف حالك ؟ إحنا بدنا العنب ولا الناطور ؟ هو اللي سايق .. وهو
أدرى !
أبو مرزوق : انخمدنا
طراااخ
ابو مرزوق يخرج عن
طوره :
صف .. صف يلعن أبو اللي نفضك .. فوق ما انت ماشي ف طريق عكس اللي بدنا
اياه .. بدك تكتلنا كلنا معاك !
الخوات يحاولن الدفاع
..
أبو مرزوق يقطع
الطريق عليهن :
اذا بسمع صرمة فيكون بتحكي همزع الصندل ع راسها ..
صف يا ابن ستة وستين وإلا قسما بالله ...
أبو هاني : خلص خلص .. هاي صفينا ..
أبو مرزوق : أشهد أن لا إله إلا الله ! .. يالا يا بنات خلينا نشوف
سواق تاني
أبو هاني : أبدا والله .. لا تشوف ولا تتصل ف
حدا .. أنا هجيب سواق ع مسؤوليتي
الخوات بين تهليل
وتكبير :
يا سلام .. فيه كده سواقين ف العالم ! والله
انك عملة نادرة يا ابو هاني ..
ابو مرزوق مش عاجبه
الكلام
الخوات : انت هيك طول عمرك ! الزلمة بدو يسيب
السيارة لحالو وبرضو مش عاجبك !! انت مش شايف كيف السواقين اللي حوالينا بيموتوا
نص الركاب ولا انهم يسيبوا الاستيرن ؟؟!!
ابو مرزوق : طيب .. الحمد لله ان بسلامتو طلع محترم وسابنا نشوف سواق
تاني
أبو هاني : لاااااء .. أنا حكيت أنا اللي
هجيب السواق التاني
أبو مرزوق : اما انك فعلا رزيل .. احنا اللي هنركب واحنا اللي هندفع
!! حل عنا وسيبنا نختار
الخوات : والله أمرك عجيب يا ابو مرزوق ! هاي
كل الركاب بتركب مع مين ما اجا .. ليش انت هيك الله خالقك معقد ؟؟
ابو مرزوق مستسلما ..
هات يا ابو هاني السواق
أبو هاني : ألو .. كيف حالك .. اسمع .. معاي
نقلة .. وانا تعبان شوية .. ايش رأيك تشيل ؟؟ ماشي .. ماشي .. الله معك .. هينا
بنستناك ..
أبو مرزوق : بس من باب الفضول يعني .. انت حكيت مع مين ؟
أبو هاني : هادا عمي .. أبو عزمي أبو العنين
أبو مرزوق منفجرا : أبو عزمي !! الله لا يعطيك عافية يا بعيد !! أعمى
!!! جايب لنا سواق كفيف ما بيشوفش !!
الخوات : اسمع يا ابو مرزوق .. احنا ساكتين
لك من الصبح ...
أبو مرزوق مقاطعا : انتو اللي ساكتين !! من الأول قلت لكم لون السيارة
ما لوش خص بالسواق !! ضيعنا وقت وكنا هنموت ومشينا عكس الاتجاه .. وبالآخير جايب
لنا سواق أعمى !! وانتو اللي ساكتين م الصبح ؟؟
أنا اللي عاصر ع حالي بوكسة لمون وساكت .. بس لاااااا .. الحين دور
الفعل مش الكلام
يخلع ابو مرزوق
الصندل من رجله (أعزكم الله) وطلع يجري ورا أبو هاني وخواته وهم يشردوا منه وهو
وراهم بالصندل ..
انتهى
خالد عبد الرحمن
11/7/2014
ليست هناك تعليقات:
إرسال تعليق